ბიოეპილაცია

ბიოეპილაცია, რომელიც ფართოდ არის ცნობილი როგორც ეპილაცია ცვილით, სხეულიდან და სახიდან არასასურველი თმის მოცილების ერთ-ერთი ყველაზე ეფექტური და ნატურალური მეთოდია. ეს არის პროცედურა, რომელიც თმას ფესვიანად აშორებს და კანს ხანგრძლივი დროით (3-დან 4 კვირამდე) ანიჭებს სიგლუვეს. ბიო ეპილაცია განსაკუთრებით პოპულარულია მისი ბუნებრივი შემადგენლობის გამო, ცვილი, რომლითაც ეპილაცია კეთდება შეიცავს ფიჭვის ფისს, ფუტკრის ცვილსა და მცენარეულ ექსტრაქტებს, რაც პროცესს უსაფრთხოსა და ჰიგიენურს ხდის.

პროცედურა იყოფა რამდენიმე ეტაპად და ცვილი სხვადასხვა ტემპერატურის მიხედვით გამოიყენება სხვადასხვა ზონაზე, ცხელი ცვილი გამოიყენება უხეში თმისთვის, ხოლო თბილი კი მგრძნობიარე ზონებისთვის. განსაკუთრებით მოთხოვნადია ცვილით ეპილაცია სახეზე, რომლის დროსაც გამოიყენება ცხელი ცვილი (45-50°C). ამ გრადუსამდე გაცხელებული ცვილი ქმნის „საუნის ეფექტს“, რაც აფართოებს ფორებს და თმის მოცილებას ნაკლებად მტკივნეულს ხდის. ეს მეთოდი იდეალურია მათთვის, ვისაც აწუხებს მუქი თმა ზედა ტუჩზე ან ნიკაპზე.

სახის ეპილაცია ყველაზე ხშირად შემდეგ ზონებზე ტარდება: ზედა ტუჩი; ნიკაპი; ლოყები; ყელი; წარბებს შორის (თუ საჭიროა ზედმეტი თმის მოცილება მათი ფორმირებისთვის).

სახის დეპილაციის კომფორტული და კარგი შედეგის უზრუნველსაყოფად, გირჩევთ, მოერიდეთ აგრესიულ პილინგს და პროცედურამდე 2-3 დღით ადრე (თუ იყენებთ) არ გამოიყენოთ მჟავები/რეტინოლი. წინა დღეს არ მიიღოთ მზის აბაზანები და არ ეწვიოთ სოლარიუმს. მიეცით თმას საშუალება, გაიზარდოს. ეპილაციას უფრო გაუჭირდება ძალიან მოკლე თმის დაჭერა.

პროფესიონალური მიდგომა უზრუნველყოფს კანის წინასწარ დეზინფექციას და შემდგომ დამუშავებას სპეციალური ლოსიონებით. ბიო ეპილაციის ფასები, სხვა აპარატურულ მეთოდებთან შედარებით, გაცილებით ხელმისაწვდომია, ხოლო რეგულარული ვიზიტების შემთხვევაში თმა საგრძნობლად თხელდება, ფერმკრთალდება და მისი ზრდის ინტენსივობა იკლებს.